Нийслэлийн Засаг дарга Х.Нямбаатараас орлого, Будапешт хотын томилолт болон Ерөнхий сайдын хүүгийн асуудлын талаар байр суурийг нь тодрууллаа.

Тэрбээр "Нийслэлийн Засаг даргын цалин гурван сая гаруй байгаа байх. Цалингийн карт руу л ордог. Өөрийн хамаарал бүхий компанийн хөрөнгө орлогын мэдүүлгийг мэдүүлсэн. "Хамаг Монгол" ХХК гээд барилга, худалдааны чиглэлийн компани бий. Манай гэр бүлийн хамаарал бүхий хүн үйл ажиллагааг нь явуулдаг. Ийм асуулт асууж магадгүй гээд би хамаарал бүхий хүмүүсээс мэдээлэл авсан. Сүүлийн найман жил гаруй хугацаанд жилд дунджаар 300 орчим сая төгрөгийг татвар төлсөн байна. Татварын ерөнхий газрын нээлттэй мэдээллийн санд бий. Төрийн худалдан авах ажиллагаанд нэг ч оролцож байгаагүй. 

1.5 их наяд төгрөгөөр гадаад томилолт төсөвлөсөн бол би хариуцлага үүрэхэд бэлэн байна. Нийслэлийн өөрийнх нь урсгал зардал ийм өртөгт багтсан байдаг. Энэ асуудалд би байр сууриа тодорхой хэлсэн. Соёлын яам болон ГХЯ-аас миний нэр дээр чиглэл ирсэн. Энэ жил Унгар, Монгол Улсын дипломат харилцаа тогтоосны 75 жилийн ой болж буй. Энэ хүрээнд аль нэг хотынхоо соёлын өдрүүдийг тэмдэглэдэг уламжлалтай бөгөөд Улаанбаатар энэ ажлыг зохион байгуулж албаны 53 хүний бүрэлдэхүүнтэй явсан. Үүний 38, 39 нь Улаанбаатар театрын уран бүтээлч байсан. 

Франкфурт-Улаанбаатар чиглэлийн нислэгийг МИАТ компанитай ярьж, 50 хувийнх нь зардлаар хоёр талын нислэгийг тооцож явсан. Үлдсэн 1000 км замд нь автобус хөлсөлж, зардал хэмнэсэн. Очоод 2000 гаруй хүнд уран бүтээлээ толилуулсан" гэв. 

Ерөнхий сайдын хүүгийн хэргийн талаар байр суурийг нь тодруулахад тэрбээр "Ерөнхий сайд тайлбараа хэлэхэд би хажууд нь байсан. Хамгийн адгийн зүйл бол гэр бүл, үр хүүхдээр нь улс төр хийх. Өөрийнх нь хууль зөрчсөн үйлдлийг тодорхой гаргаж ирэх ёстой" гэсэн хариулт өглөө.